ਰਾਏਪੁਰ (ਨੀਰੂ): ਛੱਤੀਸਗੜ੍ਹ ਦੇ ‘ਵੈਦਿਆਰਾਜ’ ਹੇਮਚੰਦ ਮਾਂਝੀ ਨੇ ਆਪਣਾ ਪਦਮ ਸ਼੍ਰੀ ਪੁਰਸਕਾਰ ਵਾਪਸ ਕਰਨ ਦਾ ਐਲਾਨ ਕੀਤਾ ਹੈ। ਉਸ ਨੇ ਇਸ ਦਾ ਕਾਰਨ ਉਸ ਨੂੰ ਨਕਸਲੀਆਂ ਵੱਲੋਂ ਮਿਲ ਰਹੀਆਂ ਧਮਕੀਆਂ ਨੂੰ ਦੱਸਿਆ। ਵੈਦਿਆਰਾਜ ਨੇ ਤਾਂ ਇੱਥੋਂ ਤੱਕ ਕਹਿ ਦਿੱਤਾ ਕਿ ਉਹ ਆਪਣਾ ਅਭਿਆਸ ਬੰਦ ਕਰ ਦੇਣਗੇ। ਹੇਮਚੰਦ ਮਾਂਝੀ ਨੂੰ ਪਿਛਲੇ ਮਹੀਨੇ ਰਾਸ਼ਟਰਪਤੀ ਭਵਨ ਵਿੱਚ ਰਵਾਇਤੀ ਦਵਾਈ ਦੇ ਖੇਤਰ ਵਿੱਚ ਦੇਸ਼ ਦਾ ਚੌਥਾ ਸਭ ਤੋਂ ਵੱਡਾ ਨਾਗਰਿਕ ਸਨਮਾਨ ਦਿੱਤਾ ਗਿਆ ਸੀ।
ਦੱਸ ਦੇਈਏ ਕਿ ਨਰਾਇਣਪੁਰ ਜ਼ਿਲ੍ਹੇ ਦੇ ਚਮੇਲੀ ਅਤੇ ਗੌਰਦੰਦ ਪਿੰਡਾਂ ਵਿੱਚ ਦੋ ਨਿਰਮਾਣ ਅਧੀਨ ਮੋਬਾਈਲ ਟਾਵਰਾਂ ਨੂੰ ਅੱਗ ਲੱਗ ਗਈ ਸੀ। ਪੁਲਸ ਨੇ ਦੱਸਿਆ ਕਿ ਉਥੇ ਬੈਨਰ ਅਤੇ ਪੈਂਫਲੇਟ ਮਿਲੇ ਹਨ, ਜਿਸ ਵਿਚ ਹੇਮਚੰਦ ਮਾਂਝੀ ਨੂੰ ਧਮਕੀ ਦਿੱਤੀ ਗਈ ਸੀ। ਪੈਂਫਲੈਟ ਵਿੱਚ ਮਾਂਝੀ ਦੀ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਤੋਂ ਪਦਮ ਸ਼੍ਰੀ ਪੁਰਸਕਾਰ ਪ੍ਰਾਪਤ ਕਰਨ ਦੀ ਤਸਵੀਰ ਸੀ।
ਨਕਸਲੀਆਂ ਦਾ ਇਲਜ਼ਾਮ ਹੈ ਕਿ ਹੇਮਚੰਦ ਮਾਂਝੀ ਨੇ ਨਰਾਇਣਪੁਰ ਦੇ ਛੋਟਾਡੋਂਗਰ ਇਲਾਕੇ ਵਿੱਚ ਅਮਦਾਈ ਵੈਲੀ ਆਇਰਨ ਓਰ ਪ੍ਰੋਜੈਕਟ ਸ਼ੁਰੂ ਕਰਨ ਵਿੱਚ ਮਦਦ ਕੀਤੀ ਸੀ ਅਤੇ ਉਸ ਨੇ ਇਸ ਲਈ ਰਿਸ਼ਵਤ ਲਈ ਹੈ। ਨਕਸਲੀਆਂ ਨੇ ਨਾ ਸਿਰਫ਼ ਦੋਸ਼ ਲਾਏ ਸਗੋਂ ਹੇਮਚੰਦ ਨੂੰ ਗੰਭੀਰ ਨਤੀਜੇ ਭੁਗਤਣ ਦੀ ਧਮਕੀ ਵੀ ਦਿੱਤੀ।
ਹੇਮਚੰਦ ਮਾਂਝੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਆਪਣੇ ਪਰਿਵਾਰ ਨਾਲ ਗੱਲ ਕੀਤੀ ਹੈ ਅਤੇ ਉਸ ਤੋਂ ਬਾਅਦ ਫੈਸਲਾ ਕੀਤਾ ਹੈ ਕਿ ਉਹ ਹੁਣ ਆਪਣਾ ਅਭਿਆਸ ਬੰਦ ਕਰ ਦੇਣਗੇ ਅਤੇ ਪਦਮਸ਼੍ਰੀ ਵੀ ਵਾਪਸ ਕਰਨਗੇ। ਦੱਸ ਦੇਈਏ ਕਿ 9 ਦਸੰਬਰ 2023 ਨੂੰ ਹੇਮਚੰਦ ਦੇ ਭਤੀਜੇ ਦੀ ਹੱਤਿਆ ਕਰ ਦਿੱਤੀ ਗਈ ਸੀ। ਇਸ ਤੋਂ ਬਾਅਦ ਹੇਮਚੰਦ ਦਾ ਪਰਿਵਾਰ ਨਾਰਾਇਣਪੁਰ ਸ਼ਹਿਰ ਵਿੱਚ ਰਹਿ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਸੁਰੱਖਿਆ ਦਿੱਤੀ ਗਈ ਹੈ।
