Women’s IPL: ਮਾਰਚ 2023 ‘ਚ ਪਹਿਲੀ ਮਹਿਲਾ ਇੰਡੀਅਨ ਪ੍ਰੀਮੀਅਰ ਲੀਗ ਲਈ ਬੀ.ਸੀ.ਸੀ.ਆਈ. ਨੇ ਆਪਣੇ ਔਰਤਾਂ ਦੇ ਘਰੇਲੂ ਕੈਲੰਡਰ ਨੂੰ ਬਦਲ ਦਿੱਤਾ ਹੈ। ਔਰਤਾਂ ਦਾ ਘਰੇਲੂ ਸੀਜ਼ਨ, ਜੋ ਆਮ ਤੌਰ ‘ਤੇ ਨਵੰਬਰ ਤੋਂ ਅਪ੍ਰੈਲ ਤੱਕ ਚੱਲਦਾ ਹੈ, ਨੂੰ ਇੱਕ ਮਹੀਨਾ ਅੱਗੇ ਵਧਾ ਦਿੱਤਾ ਗਿਆ ਹੈ।
2022-23 ਲਈ ਸੀਨੀਅਰ ਮਹਿਲਾ ਸੀਜ਼ਨ ਹੁਣ 11 ਅਕਤੂਬਰ ਨੂੰ ਇੱਕ ਟੀ-20 ਈਵੈਂਟ ਨਾਲ ਸ਼ੁਰੂ ਹੋਵੇਗਾ ਅਤੇ ਅਗਲੇ ਸਾਲ ਫਰਵਰੀ ਵਿੱਚ ਇੱਕ ਅੰਤਰ-ਖੇਤਰੀ ਵਨਡੇ ਨਾਲ ਸਮਾਪਤ ਹੋਵੇਗਾ। ਖਾਸ ਕਰਕੇ ਬੀ.ਸੀ.ਸੀ.ਆਈ. 2018 ਤੋਂ ਮਹਿਲਾ ਟੀ-20 ਚੈਲੇਂਜ ਦਾ ਆਯੋਜਨ ਕਰ ਰਹੀ ਹੈ, ਜੋ ਕੋਵਿਡ-19 ਮਹਾਮਾਰੀ ਕਾਰਨ 2021 ਵਿੱਚ ਨਹੀਂ ਹੋਈ ਸੀ। ਤਿੰਨ ਟੀਮਾਂ ਦੇ ਮੁਕਾਬਲੇ ਵਿੱਚ ਭਾਰਤ ਤੋਂ ਬਾਹਰ ਦੇ ਕਈ ਨਾਮਵਰ ਖਿਡਾਰੀ ਭਾਗ ਲੈਂਦੇ ਹਨ।
ਤੁਹਾਨੂੰ ਦੱਸ ਦੇਈਏ ਕਿ ਫਰਵਰੀ ਵਿੱਚ ਹੀ ਬੀਸੀਸੀਆਈ ਦੇ ਪ੍ਰਧਾਨ ਸੌਰਵ ਗਾਂਗੁਲੀ ਨੇ ਕਿਹਾ ਸੀ ਕਿ ਮਹਿਲਾ ਆਈਪੀਐਲ 2023 ਵਿੱਚ ਸ਼ੁਰੂ ਹੋਵੇਗੀ। ਗਾਂਗੁਲੀ ਨੇ ਫਰਵਰੀ ਵਿੱਚ ਹੋਈ ਆਈਪੀਐਲ ਗਵਰਨਿੰਗ ਬਾਡੀ ਦੀ ਮੀਟਿੰਗ ਤੋਂ ਬਾਅਦ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਸੀ ਕਿ ਮਹਿਲਾ ਆਈਪੀਐਲ ਲਈ ਏਜੀਐਮ ਨੂੰ ਮਨਜ਼ੂਰੀ ਮਿਲੇਗੀ, ਉਸ ਤੋਂ ਬਾਅਦ ਹੀ ਅਸੀਂ ਇਸ ਨੂੰ ਸ਼ੁਰੂ ਕਰਨ ਦੀ ਯੋਜਨਾ ਬਣਾ ਸਕਦੇ ਹਾਂ।
