ਸਿਓਲ (ਰਾਘਵ): ਉੱਤਰੀ ਕੋਰੀਆ ਅਤੇ ਦੱਖਣੀ ਕੋਰੀਆ ਵਿਚਾਲੇ ਗਰਮਾ-ਗਰਮ ਬਹਿਸ ਜਾਰੀ ਹੈ ਇਸ ਦੌਰਾਨ ਉੱਤਰੀ ਕੋਰੀਆ ਨੇ ਉੱਤਰ-ਪੂਰਬੀ ਦਿਸ਼ਾ ਵੱਲ ਦੋ ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ। ਤੁਹਾਨੂੰ ਦੱਸ ਦੇਈਏ ਕਿ ਇਹ ਕਾਰਵਾਈ ਅਮਰੀਕਾ, ਦੱਖਣੀ ਕੋਰੀਆ ਅਤੇ ਜਾਪਾਨ ਦੇ ਸਾਂਝੇ ਫੌਜੀ ਅਭਿਆਸ ਦੇ ਜਵਾਬ ਵਿੱਚ ਕੀਤੀ ਗਈ ਹੈ। ਉੱਤਰੀ ਕੋਰੀਆ ਦੇ ਜੁਆਇੰਟ ਚੀਫ ਆਫ ਸਟਾਫ ਨੇ ਮਿਜ਼ਾਈਲ ਲਾਂਚ ਦੀ ਜਾਣਕਾਰੀ ਦਿੱਤੀ ਹੈ।
ਜੁਆਇੰਟ ਚੀਫ਼ ਆਫ਼ ਸਟਾਫ ਨੇ ਕਿਹਾ ਹੈ ਕਿ ਮਿਜ਼ਾਈਲਾਂ ਨੂੰ ਦੱਖਣ-ਪੂਰਬੀ ਉੱਤਰੀ ਕੋਰੀਆ ਦੇ ਜੰਗਯੋਨ ਸ਼ਹਿਰ ਤੋਂ ਉੱਤਰ-ਪੂਰਬ ਵੱਲ 10 ਮਿੰਟ ‘ਤੇ ਲਾਂਚ ਕੀਤਾ ਗਿਆ ਸੀ। ਇਸ ਨੇ ਕਿਹਾ ਕਿ ਪਹਿਲੀ ਮਿਜ਼ਾਈਲ ਨੇ 600 ਕਿਲੋਮੀਟਰ (370 ਮੀਲ) ਅਤੇ ਦੂਜੀ ਮਿਜ਼ਾਈਲ ਨੇ 120 ਕਿਲੋਮੀਟਰ (75 ਮੀਲ) ਤੱਕ ਉਡਾਣ ਭਰੀ, ਪਰ ਇਹ ਨਹੀਂ ਦੱਸਿਆ ਕਿ ਉਹ ਕਿੱਥੇ ਡਿੱਗੀ। ਉੱਤਰੀ ਕੋਰੀਆ ਆਮ ਤੌਰ ‘ਤੇ ਆਪਣੇ ਪੂਰਬੀ ਪਾਣੀਆਂ ਵੱਲ ਮਿਜ਼ਾਈਲਾਂ ਦਾ ਪ੍ਰੀਖਣ ਕਰਦਾ ਹੈ, ਪਰ ਦੂਜੀ ਮਿਜ਼ਾਈਲ ਦੀ ਉਡਾਣ ਪਾਣੀਆਂ ਤੱਕ ਪਹੁੰਚਣ ਲਈ ਬਹੁਤ ਘੱਟ ਸੀ।
ਦੱਖਣੀ ਕੋਰੀਆ ਦੇ ਇਕ ਫੌਜੀ ਸੂਤਰ ਨੇ ਕਿਹਾ ਕਿ ਇਸ ਗੱਲ ਦੀ ਪੂਰੀ ਸੰਭਾਵਨਾ ਸੀ ਕਿ ਦੂਜੀ ਮਿਜ਼ਾਈਲ ਉੱਤਰ ਦੇ ਅੰਦਰੂਨੀ ਖੇਤਰ ‘ਚ ਕ੍ਰੈਸ਼ ਹੋ ਗਈ। ਉੱਤਰ ਵੱਲ ਜ਼ਮੀਨ ‘ਤੇ ਸੰਭਾਵਿਤ ਨੁਕਸਾਨ ਦੀ ਤੁਰੰਤ ਰਿਪੋਰਟ ਨਹੀਂ ਕੀਤੀ ਗਈ। ਦੱਖਣੀ ਕੋਰੀਆ ਦੇ ਜੁਆਇੰਟ ਚੀਫ ਆਫ ਸਟਾਫ ਨੇ ਵੀ ਹਾਲ ਹੀ ਵਿਚ ਕਿਹਾ ਸੀ ਕਿ ਦੱਖਣੀ ਕੋਰੀਆ ਅਮਰੀਕਾ ਨਾਲ ਮਿਲਟਰੀ ਗਠਜੋੜ ਦੇ ਨਾਲ ਉੱਤਰੀ ਕੋਰੀਆ ਦੁਆਰਾ ਕਿਸੇ ਵੀ ਭੜਕਾਹਟ ਨੂੰ ਨਾਕਾਮ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ।
