ਦੁਬਈ: ਇੰਗਲੈਂਡ ਖਿਲਾਫ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਦੇ ਪਹਿਲੇ ਮੈਚ ‘ਚ ਇਕਤਰਫਾ ਜਿੱਤ ਨਾਲ ਭਾਰਤ ਨੇ ਬੁੱਧਵਾਰ ਨੂੰ ਜਾਰੀ ਅੰਤਰਰਾਸ਼ਟਰੀ ਕ੍ਰਿਕਟ ਪਰਿਸ਼ਦ (ICC) ਦੀ ਟੀਮ ਰੈਂਕਿੰਗ ‘ਚ ਪਾਕਿਸਤਾਨ ਨੂੰ ਪਛਾੜ ਕੇ ਤੀਜੇ ਸਥਾਨ ‘ਤੇ ਪਹੁੰਚ ਗਿਆ। ਭਾਰਤ 105 ਅੰਕਾਂ ਨਾਲ ਚੌਥੇ ਸਥਾਨ ‘ਤੇ ਸੀ ਪਰ ਮੰਗਲਵਾਰ ਨੂੰ 10 ਵਿਕਟਾਂ ਦੀ ਜਿੱਤ ਨਾਲ 108 ਰੇਟਿੰਗ ਅੰਕਾਂ ‘ਤੇ ਪਹੁੰਚ ਗਿਆ ਹੈ। ਪਾਕਿਸਤਾਨ 106 ਅੰਕਾਂ ਨਾਲ ਚੌਥੇ ਸਥਾਨ ‘ਤੇ ਖਿਸਕ ਗਿਆ ਹੈ। ਨਿਊਜ਼ੀਲੈਂਡ 126 ਅੰਕਾਂ ਨਾਲ ਸਭ ਤੋਂ ਅੱਗੇ ਹੈ ਜਦਕਿ ਇੰਗਲੈਂਡ 122 ਅੰਕਾਂ ਨਾਲ ਦੂਜੇ ਸਥਾਨ ‘ਤੇ ਹੈ।
ਪਿਛਲੇ ਮਹੀਨੇ ਪਾਕਿਸਤਾਨ ਨੇ ਵੈਸਟਇੰਡੀਜ਼ ਖਿਲਾਫ ਕਲੀਨ ਸਵੀਪ ਕਰਕੇ ਭਾਰਤ ਨੂੰ ਪਛਾੜ ਕੇ ਤੀਜੇ ਸਥਾਨ ‘ਤੇ ਪਹੁੰਚ ਗਿਆ ਸੀ। ਸ਼੍ਰੀਲੰਕਾ ਦੇ ਖਿਲਾਫ ਆਸਟਰੇਲੀਆ ਦੀ ਵਨਡੇ ਸੀਰੀਜ਼ ਹਾਰਨ ਨੇ ਵੀ ਉਸ ਦੀ ਮਦਦ ਕੀਤੀ। ਹਾਲਾਂਕਿ ਟੀਮ ਜ਼ਿਆਦਾ ਦੇਰ ਤੀਜੇ ਸਥਾਨ ‘ਤੇ ਨਹੀਂ ਟਿਕ ਸਕੀ ਅਤੇ ਭਾਰਤ ਨੇ ਇਕ ਵਾਰ ਫਿਰ ਇਸ ਸਥਾਨ ‘ਤੇ ਕਬਜ਼ਾ ਕਰ ਲਿਆ। ਭਾਰਤ ਇਸ ਮਹੀਨੇ ਇੰਗਲੈਂਡ ਖਿਲਾਫ ਬਾਕੀ ਦੋ ਵਨਡੇ ਅਤੇ ਵੈਸਟਇੰਡੀਜ਼ ਖਿਲਾਫ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ‘ਚ ਬਿਹਤਰ ਪ੍ਰਦਰਸ਼ਨ ਨਾਲ ਤੀਜੇ ਸਥਾਨ ‘ਤੇ ਆਪਣੀ ਸਥਿਤੀ ਨੂੰ ਹੋਰ ਮਜ਼ਬੂਤ ਕਰ ਸਕਦਾ ਹੈ।
ਜੇਕਰ ਭਾਰਤ ਇੰਗਲੈਂਡ ਦੇ ਖਿਲਾਫ ਬਾਕੀ ਦੋ ਵਨਡੇ ਹਾਰਦਾ ਹੈ ਤਾਂ ਟੀਮ ਪਾਕਿਸਤਾਨ ਤੋਂ ਬਾਅਦ ਚੌਥੇ ਸਥਾਨ ‘ਤੇ ਖਿਸਕ ਜਾਵੇਗੀ।ਪਾਕਿਸਤਾਨ ਅਗਲੇ ਮਹੀਨੇ ਰੋਟਰਡਮ ‘ਚ ਨੀਦਰਲੈਂਡ ਖਿਲਾਫ ਅਗਲੀ ਵਨਡੇ ਸੀਰੀਜ਼ ਖੇਡੇਗਾ। ਬਾਬਰ ਆਜ਼ਮ ਦੀ ਅਗਵਾਈ ਵਾਲੀ ਟੀਮ ਦੌਰੇ ‘ਤੇ ਪੰਜ ਦਿਨਾਂ ‘ਚ ਤਿੰਨ 50 ਓਵਰਾਂ ਦੇ ਮੈਚ ਖੇਡੇਗੀ।
