ਮੁੰਬਈ (ਜਸਪ੍ਰੀਤ) : ਬਾਲੀਵੁੱਡ ਅਦਾਕਾਰਾ ਰਕੁਲ ਪ੍ਰੀਤ ਸਿੰਘ ਆਉਣ ਵਾਲੇ ਸਮੇਂ ‘ਚ ਫਿਲਮ ਦੇ ਦੇ ਪਿਆਰ ਦੇ ‘ਚ ਨਜ਼ਰ ਆਵੇਗੀ। ਇਹ ਇੱਕ ਰੋਮਾਂਟਿਕ ਕਾਮੇਡੀ ਡਰਾਮਾ ਫਿਲਮ ਹੈ, ਜਿਸ ਵਿੱਚ ਉਸ ਦੇ ਨਾਲ ਅਜੇ ਦੇਵਗਨ ਅਤੇ ਆਰ ਮਾਧਵਨ ਵੀ ਨਜ਼ਰ ਆਉਣਗੇ। ਹਾਲ ਹੀ ‘ਚ ਅਦਾਕਾਰਾ ਨੂੰ ਵਰਕਆਊਟ ਦੌਰਾਨ ਗੰਭੀਰ ਸੱਟ ਲੱਗ ਗਈ ਸੀ। ਦਰਅਸਲ, ਅਭਿਨੇਤਰੀ ਜਿਮ ‘ਚ 80 ਕਿਲੋ ਦੀ ਡੈੱਡਲਿਫਟ ਕਰ ਰਹੀ ਸੀ, ਜਿਸ ਕਾਰਨ ਉਸ ਦੀ ਪਿੱਠ ‘ਤੇ ਸੱਟ ਲੱਗ ਗਈ। ਅਦਾਕਾਰਾ ਪਿਛਲੇ ਇੱਕ ਹਫ਼ਤੇ ਤੋਂ ਬੈੱਡ ਰੈਸਟ ‘ਤੇ ਹੈ ਅਤੇ ਹੌਲੀ-ਹੌਲੀ ਠੀਕ ਹੋ ਰਹੀ ਹੈ। ਮਿਡ ਡੇਅ ਦੀ ਰਿਪੋਰਟ ਮੁਤਾਬਕ, “ਰਕੁਲ ਪਿਛਲੇ ਕੁਝ ਦਿਨਾਂ ਤੋਂ ਮੰਜੇ ‘ਤੇ ਪਈ ਹੈ ਅਤੇ ਉਸ ਦੀ ਹਾਲਤ ਕਾਫੀ ਡਰਾਉਣੀ ਹੈ। ਉਸ ਨੂੰ ਇਹ ਸੱਟ 5 ਅਕਤੂਬਰ ਦੀ ਸਵੇਰ ਨੂੰ ਲੱਗੀ, ਜਦੋਂ ਰਕੁਲ ਆਪਣੀ ਕਸਰਤ ਕਰ ਰਹੀ ਸੀ। ਉਸਨੇ ਬਿਨਾਂ ਬੈਲਟ ਪਹਿਨੇ 80 ਕਿਲੋਗ੍ਰਾਮ ਦੀ ਡੈੱਡਲਿਫਟ ਕੀਤੀ, ਜਿਸ ਕਾਰਨ ਉਸਦੀ ਪਿੱਠ ਵਿੱਚ ਕੜਵੱਲ ਪੈਦਾ ਹੋ ਗਈ।”
ਹਾਲਾਂਕਿ, ਅਭਿਨੇਤਰੀ ਨੇ ਇਸ ਨੂੰ ਨਜ਼ਰਅੰਦਾਜ਼ ਕੀਤਾ ਅਤੇ ਕਸਰਤ ਜਾਰੀ ਰੱਖੀ, ਜਿਸ ਕਾਰਨ ਉਸ ਦੀ ਸੱਟ ਵਿਗੜ ਗਈ। ਹੁਣ ਡਾਕਟਰ ਨੇ ਉਨ੍ਹਾਂ ਨੂੰ ਲਗਾਤਾਰ ਆਰਾਮ ਕਰਨ ਦੀ ਸਲਾਹ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ ਰਕੁਲ ਨੇ ਲਗਭਗ ਦੋ ਦਿਨ ਲਗਾਤਾਰ ਮਾਸਪੇਸ਼ੀਆਂ ਨੂੰ ਆਰਾਮ ਦੇਣ ਵਾਲੀ ਦਵਾਈ ਲੈ ਕੇ ਆਪਣੀ ਆਉਣ ਵਾਲੀ ਫਿਲਮ ‘ਦੇ ਦੇ ਪਿਆਰ ਦੇ 2’ ਦੀ ਸ਼ੂਟਿੰਗ ਜਾਰੀ ਰੱਖੀ। ਤਿੰਨ ਦਿਨ ਤਕ ਦਰਦ ਸਹਿਣ ਤੋਂ ਬਾਅਦ ਉਹ ਫਿਜ਼ੀਓ ਕੋਲ ਗਈ। ਪਰ ਜਨਮ ਦਿਨ ‘ਤੇ ਉਸ ਦੀ ਹਾਲਤ ਹੋਰ ਵੀ ਖਰਾਬ ਹੋ ਗਈ। ਰਿਪੋਰਟ ‘ਚ ਦਾਅਵਾ ਕੀਤਾ ਗਿਆ ਹੈ ਕਿ ਸੱਟ ਕਾਰਨ ਰਕੁਲ ਦੀਆਂ L4, L5 ਅਤੇ S1 ਨਸਾਂ ਬਲਾਕ ਹੋ ਗਈਆਂ ਹਨ। ਉਨ੍ਹਾਂ ਦਾ ਬੀਪੀ ਅਚਾਨਕ ਘਟ ਗਿਆ ਜਿਸ ਤੋਂ ਬਾਅਦ ਡਾਕਟਰ ਨੇ ਉਨ੍ਹਾਂ ਨੂੰ ਆਰਾਮ ਕਰਨ ਦੀ ਸਲਾਹ ਦਿੱਤੀ। ਰਕੁਲ ਪ੍ਰੀਤ ਸਿੰਘ ਨੇ ਸਾਲ 2009 ਵਿੱਚ ਕੰਨੜ ਫਿਲਮ ਗਿਲੀ ਨਾਲ ਅਦਾਕਾਰੀ ਦੀ ਦੁਨੀਆ ਵਿੱਚ ਪ੍ਰਵੇਸ਼ ਕੀਤਾ। ਇਸ ਤੋਂ ਬਾਅਦ ਉਸਨੇ ਹਿਮਾਂਸ਼ ਖੁਰਾਣਾ ਨਾਲ ‘ਯਾਰੀਆਂ’ ਰਾਹੀਂ ਹਿੰਦੀ ਫਿਲਮਾਂ ‘ਚ ਡੈਬਿਊ ਕੀਤਾ। ਇਹ ਫਿਲਮ ਸਾਲ 2014 ‘ਚ ਰਿਲੀਜ਼ ਹੋਈ ਸੀ। ਹਾਲ ਹੀ ‘ਚ ਉਹ ਕਮਲ ਹਾਸਨ ਨਾਲ ਤਾਮਿਲ ਫਿਲਮ ‘ਇੰਡੀਅਨ 2’ ‘ਚ ਨਜ਼ਰ ਆਈ ਸੀ।
