ਸਿਓਲ (ਰਾਘਵ) : ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਇਨ੍ਹੀਂ ਦਿਨੀਂ ਉੱਤਰੀ ਕੋਰੀਆ ਦੇ ਦੌਰੇ ‘ਤੇ ਹਨ। ਰਾਜਧਾਨੀ ਪਿਓਂਗਯਾਂਗ ਦੇ ਹਵਾਈ ਅੱਡੇ ‘ਤੇ ਉੱਤਰੀ ਕੋਰੀਆ ਦੇ ਤਾਨਾਸ਼ਾਹ ਕਿਮ ਜੋਂਗ ਨੇ ਖੁਦ ਪੁਤਿਨ ਨੂੰ ਜੱਫੀ ਪਾ ਕੇ ਸਵਾਗਤ ਕੀਤਾ। ਇਸ ਦੇ ਨਾਲ ਹੀ ਦੋਹਾਂ ਨੇਤਾਵਾਂ ਦੀ ਇੰਨੀ ਨਿੱਘੀ ਮੁਲਾਕਾਤ ਕਾਰਨ ਅਮਰੀਕਾ ਸਮੇਤ ਪੱਛਮੀ ਦੇਸ਼ਾਂ ਨੇ ਆਪਣੇ ਸਾਹ ਰੋਕ ਲਏ ਹਨ। ਇਸ ਦੌਰਾਨ, ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਅਤੇ ਤਾਨਾਸ਼ਾਹ ਕਿਮ ਜੋਂਗ ਉਨ ਨੇ ਬੁੱਧਵਾਰ ਨੂੰ ਪਿਓਂਗਯਾਂਗ ਵਿੱਚ ਇੱਕ ਵਿਆਪਕ ਰਣਨੀਤਕ ਸਾਂਝੇਦਾਰੀ ‘ਤੇ ਹਸਤਾਖਰ ਕੀਤੇ ਹਨ। ਸਮਝੌਤੇ ਮੁਤਾਬਕ ਦੋਵਾਂ ਮੁਲਕਾਂ ਨੇ ਕਿਸੇ ਹੋਰ ਮੁਲਕ ਵੱਲੋਂ ਹਮਲਾ ਹੋਣ ’ਤੇ ਇੱਕ ਦੂਜੇ ਦੀ ਮਦਦ ਕਰਨ ਦਾ ਵਾਅਦਾ ਕੀਤਾ।
ਇਸ ਮੌਕੇ ਪੁਤਿਨ ਨੇ ਕਿਮ ਨੂੰ ਰੂਸ ਦੀ ਬਣੀ ਆਲੀਸ਼ਾਨ ਔਰਸ ਲਿਮੋਜ਼ਿਨ ਕਾਰ ਭੇਟ ਕੀਤੀ। ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਨੂੰ ਲਗਜ਼ਰੀ ਕਾਰਾਂ ਦਾ ਸ਼ੌਕੀਨ ਮੰਨਿਆ ਜਾਂਦਾ ਹੈ। ਯੂਕਰੇਨ ਵਿਵਾਦ ਦਰਮਿਆਨ ਰੂਸੀ ਰਾਸ਼ਟਰਪਤੀ ਪੁਤਿਨ ਦੀ 24 ਸਾਲ ਬਾਅਦ ਉੱਤਰੀ ਕੋਰੀਆ ਦੀ ਯਾਤਰਾ ਨੂੰ ਕਾਫੀ ਅਹਿਮ ਮੰਨਿਆ ਜਾ ਰਿਹਾ ਹੈ। ਪੁਤਿਨ ਪਿਓਂਗਯਾਂਗ ਵਿੱਚ ਸ਼ਾਨਦਾਰ ਸਵਾਗਤ ਅਤੇ ਉੱਤਰੀ ਕੋਰੀਆ ਦੇ ਪੂਰਨ ਸਮਰਥਨ ਤੋਂ ਖੁਸ਼ ਨਜ਼ਰ ਆਏ। ਮੰਨਿਆ ਜਾ ਰਿਹਾ ਹੈ ਕਿ ਉੱਤਰੀ ਕੋਰੀਆ ਆਰਥਿਕ ਸਹਾਇਤਾ ਅਤੇ ਤਕਨਾਲੋਜੀ ਦੇ ਤਬਾਦਲੇ ਦੇ ਬਦਲੇ ਰੂਸ ਨੂੰ ਗੋਲਾ-ਬਾਰੂਦ ਅਤੇ ਹੋਰ ਫੌਜੀ ਸਹਾਇਤਾ ਪ੍ਰਦਾਨ ਕਰ ਸਕਦਾ ਹੈ। ਦੋਹਾਂ ਦੇਸ਼ਾਂ ਵਿਚਾਲੇ ਹੋਏ ਸਮਝੌਤੇ ‘ਚ ਇਕ-ਦੂਜੇ ਦੀ ਮਦਦ ਨੂੰ ਸਪੱਸ਼ਟ ਨਹੀਂ ਕੀਤਾ ਗਿਆ ਹੈ। ਪਰ ਪੁਤਿਨ ਨੇ ਉੱਤਰੀ ਕੋਰੀਆ ਦੇ ਨਾਲ ਰੂਸ ਦੇ ਫੌਜੀ ਅਤੇ ਤਕਨੀਕੀ ਸਹਿਯੋਗ ਨੂੰ ਰੱਦ ਨਹੀਂ ਕੀਤਾ। ਪੁਤਿਨ ਨੇ ਯੂਕਰੇਨ ਨੀਤੀ ਨੂੰ ਲੈ ਕੇ ਰੂਸ ਦੇ ਬਿਨਾਂ ਸ਼ਰਤ ਸਮਰਥਨ ਲਈ ਉੱਤਰੀ ਕੋਰੀਆ ਦਾ ਧੰਨਵਾਦ ਕੀਤਾ।
